| Lekua: Tabakalera. Z aretoa Data: 2025eko azaroaren 7a (ostirala), 19:30 Publikoa: guztientzat Iraupena: 90 minutu |
Umorea, eta jakina, zientzia asko. Horiek dira Zientzia Club formularen osagai nagusiak. 2014ko Zientzia Astean izan zen estreinaldia eta ordutik arrakasta ziurtatuta dago urtero. Baina, zer da zehazki Zientzia Club? EHUko ikertzaileek ikuskizuneko egileak eta protagonistak dira. Bakarrizketa bat izan daiteke, solasaldi bat, ikuskizun bat, edo horien guztien arteko nahasketa ezin hobea. Xedea da beren ikerketak edo gaurkotasun-gaiak azaltzea.
Zientzia eta EHUn egiten den ikerketa-lana zabaltzeko era dibertigarria, dudarik gabe.
Aurten honako bakarrizketa hauek izango ditugu:
Argirik gabe ba al dago kolorerik?
| Jose Maria Etxabe Urbieta Hizkuntza: euskara |
Bakarrizketa honetan kolore primarioak eta sekundarioak, koloreen batura eta kenketarekin jarduera praktikoak egitea proposatzen da. Horrez gain, burmuinaren eragina aztertu nahi da ilusio optiko ezberdinen bitartez.
Luz, sensores y plásticos: una historia de drama… con final reciclable
| Lucero Mescli Hernández Cedillo Hizkuntza: gaztelania |
“Luz, sensores y plásticos: una historia de drama… con final reciclable” umorezko bakarrizketa zientifiko bat da, dibulgazioa, ingurumen-kontzientzia eta barre-algarak uztartzen dituena. Eguneroko egoeren eta pop erreferentzien bidez, hainbat gai jorratzen dira, hala nola plastikoek eragindako kutsadura, argiaren magia, zuntz optikoak, optika modernoa eta sentsoreek gaur egungo zientzian duten papera.
Sugeen pozoiaren kimika: toxina hilgarria eta sendagaia tanta berean
| Ainara Sangroniz Hizkuntza: euskara |
Sugeen pozoia sustantzia natural toxikoenetariko bat da, harrapakinak hiltzeko gai dena kantitate txiki batekin. Hala ere, pozoian gaitz ugari sendatzeko balio duten molekulak aurkitu daitezke bihotzetako gaitzak, minbizia edota minaren aurka erabilgarriak direnak. Hitzaldi honetan sugeen pozoiaren kimika aztertuko da.
Argia eta koloreak: Nola desberdintzen ditugu?
| Jon Mattin Matxain Beraza Hizkuntza: euskara |
Koloreak gauzen ezaugarriak dira. Gorri, urdin, berde… Baina, zer dago koloreen atzetik? Zergatik antzematen ditugu? Hitzaldi honetan koloreen atzean dauden molekulak eta argia uztartuko dira, publiko orokorrorari zuzenduta dagoen hitzaldian. Horrela, kolorea zer den eta izaki bizidunok kolorea nola ikusten dugun azalduko da modu entretenigarrian.
Gure baitako ekosistema: onak, txarrak eta superbakterioak
| Lide Arana Urbieta Hizkuntza: euskara |
Gure gorputza ez da bakarrik guk osatzen dugun zerbait: ekosistema bizia da. Trilioika mikroorganismo —bakterio, birus eta onddo— gurekin bizi dira eta gure osasunean funtsezko rola jokatzen dute. Hitzaldi honetan gure baitako ekosistemaz arituko gara eta bizikideekin ditugun harremanetaz.